Manila, Philippines – Nakatakdang maglunsad ang Department of Agriculture (DA) ng ‘FMR Watch Website” na magsisilbi bilang sumbungan ng publiko sa mga Farm-to Market-Road na ginagawa sakanilang lugar na sa tingin nila ay may anomalayang nagaganap.
Sa naturang website, maaaring mag-upload ng mga litrato okaya naman mag report ang publiko tungkol sa mga FMR projects kung nakikita nila ito na walang progreso.
Ayon sa DA, ang partisipasyon ng publiko sa pagbabantay ng mga maanomalyang proyekto ay malaking tulong sakanilang ahensya para maiwasan ang korapsyon.
Partikular na hinikayat ng Kagawaran na magsumbong sa FMR Watch ang mga magsasaka na silang kadalasang naaapektuhan kung hindi maayos ang mga kalsada na ginawa para sana sa mas madaling transportasyon ng mga produktong pang-agrikultura.
Bukod sa FMR Watch, bubuo din ang DA ng portal kung saan naman makikita ang eksaktong lokasyon ng mga FMR projects.
Kaugnay nito, simula sa susunod na taon ang DA na ang mangangasiwa sa pagpapagawa ng mga kalsada na dating nasa pangangalaga ng Department of Public Works and Highways (DPWH) .
Matatandaang ilan sa mga FMR projects ng DA na nasa ilalim ng DPWH ay nasasangkot ngayon sa maanomalyang flood control projects na kung hindi substandard ay ghost projects.
Mula sa target sanang 131,000 kilometers na mga kalsadang maipapagawa, 60,000 pa ang nananatiling hindi nagawa na sa tingin ng DA ay aabutin pa ito ng ilang dekada bago matapos.
Samantala, sa nagpapatuloy naman na pagdinig ng senado sa proposed budget ng Kagawaran ng Agrikultura, unti unti ring nadidiskubre ang mga ghost at substandard farm to market road.