Manila, Philippines – Nagkaisa ang iba’t ibang sektor ng lipunan sa makabuluhang ceremonial lighting na ginanap sa SM North EDSA tunnel bilang suporta sa 18-Day Campaign to End Violence Against Women (VAW), sa pangunguna ng SM Cares.
Binigyang-liwanag ang iconic na lugar bilang simbolo ng pagkakaisa at panawagan upang wakasan ang karahasan laban sa kababaihan, kung saan nagtipon ang mga kinatawan mula sa pampubliko at pribadong sektor, civil society organizations, United Nations agencies, at mga kasapi ng Inter-Agency Council on Violence Against Women and their Children (IACVAWC) upang ipahayag ang kanilang buong suporta sa kampanya.
Nagbigay-diin din sa programa si Ms. Liza Silerio, Vice President for Corporate Compliance Group ng SM Supermalls at Program Director para sa SM Environment and Sustainability, tungkol sa patuloy na pakikipagtulungan ng kanilang institusyon upang isulong ang ligtas na espasyo para sa kababaihan.
Samantala, nagpahayag ng suporta si Dr. Junice Melgar, co-founder at Executive Director ng Likhaan Center for Women’s Health, at nanindigan laban sa gender inequality, kasabay ng pangakong ipagpapatuloy ang adbokasiya para sa karapatan at kalusugan ng kababaihan.
Nakiisa rin si Quezon City Mayor Joy Belmonte, na binigyang-diin ang papel ng lokal na pamahalaan sa pagprotekta sa kababaihan.
Ipinagmalaki niya ang mga inisyatiba tulad ng Task Force Magdalena at pagpapatayo ng mga ligtas na espasyo sa lungsod, kabilang ang pag-iilaw sa mga pangunahing kalsada upang masiguro ang seguridad ng kababaihan at kabataan.
Ayon kay Belmonte, mahigit 2,000 kaso ng karahasan laban sa kababaihan ang natulungan ng lokal na pamahalaan ngayong taon.
Ang seremonya ay nagsilbing paalala na ang laban kontra VAW ay hindi lamang responsibilidad ng iisang sektor, kundi kolektibong adhikain para sa isang lipunang ligtas, pantay, at nagbibigay-proteksyon sa karapatan ng bawat kababaihan at batang babae.