Manila, Philippines – Isa sa mga naging sentro ng administrasyong Marcos ay ang pagtugon sa isyu ng kahirapan, kagutuman, krisis, at iba pang social welfare issues sa bansa.
At kung mayroon mang mukha ang kahirapan, madalas itong nakikita sa mga kalsada—mga street dwellers na walang permanenteng tahanan at sa lansangan nanunuluyan.
Bilang pagtugon at pagtulong sa mga kababayan nating nasa ganitong sitwasyon at kalagayan, mas pinaiigting pa ng pamahalaan ang Oplan Pag-Abot Program ng Department of Social Welfare and Development.
2023 nang ilunsad ng DSWD ang Oplan Pag-Abot Program—isang programa na layong matulungan ang mga kababayang nasa street situations, maialis sila sa kalsada at maibalik o mabigyan ng panibagong tahanan.
Bukod sa paglalayo sa mga bata, indibidwal o pamilya mula sa posibleng panganib sa paninirahan sa kalsada, layon din ng programa na mabigyan sila ng bagong mga oportunidad nang hindi na nila kailanganing bumalik pa sa pakikipagsapalaran sa mga lansangan.
Ayon kay DSWD Secretary Rex Gatchalian, nag-iikot ang Pag-Abot team sa iba’t ibang lugar sa Metro Manila para mahikayat ang mga street dwellers na sumama sa kanila at pansamantalang kupkupin ng ahensya.
Sa 12,000 na individuals in street situations na naprofile ng kanilang ahensya, 7,000 na raw sa mga ito ang nahikayat na nilang sumama sa ahensya.
Kamakailan, nagturn-over si Pangulong Ferdinand Marcos Jr. ng daan-daang kalabaw sa Aeta community sa Pampanga, dahil ito ang naging hiling nila para hindi na bumaba at manatili pa sa lansangan, lalo na sa panahon ng Pasko.
Ngayong linggo, magbibigay rin ang pamahalaan ng mga bangka para naman sa Badjao community doon.
Hindi rin inaalis ng DSWD ang posibleng pagbalik sa lansangan ng mga nauna na nilang natulungan. Ngunit, handa raw sila na tulungan at suportahan muli ang mga ito nang ayon sa kanilang mga pangangailangan.
Siniguro rin ni Gatchalian na hindi naagrabyado o naaapakan ang karapatang pantao ng mga street dwellers sa pagsasagawa ng Oplan Pag-Abot at na hindi sila sapilitang nangdadampot.
At ngayong nalalapit na kapaskuhan, may panawagan si Gatchalian para sa publiko na nais tumulong sa mga kababayan nating street dwellers.
Nangako naman ang DSWD na magpapatuloy pa ang Oplan Pag-Abot, maging ang iba pang mga programa ng DSWD at ng pamahalaan upang masuportahan at matugunan ang pangangailangan ng bawat Pilipino.—Mia Layaguin, Eurotv News