Manila, Philippines – Aprubado na ni Pangulong Ferdinand Marcos Jr. ang naging rekomendasyon ng Department of Agriculture (DA) na palawigin pa ang rice import ban hanggang katapusan ng 2025.
Kinumpirma ito ni Agriculture Secretary Francisco Tiu Laurel Jr.
Ayon sa kalihim, mahalagang hakbang ito upang manatiling matatag ang farmgate prices ng palay na kung dati ay naibebenta lamang ito ng mga magsasaka sa presyong walong piso kada kilo, ngayon ay naglalaro na ito sa P13-14 kada kilo.
Matatandaan na una nang sinuspinde ng 60 araw ang pag-aangkat ng imported na bigas noong September at natapos ng October 31.
Sa halos dalawang buwan daw na ito ayon sa DA, nakita nila ang bahagyang pagtaas sa presyo ng palay kasabay ng anihan.
Nabalanse din daw sa pagitan ng mga buwan ang presyo ng bigas sa merkado na nagkakahalaga ng P42 sa well-milled rice habang inaasahan naman ang pagbaba pa sa presyo ng regular milled rice ng P40 kada kilo sa Nobyembre.
Samantala sinabi ng DA na ang pansamantalang suspensyon sa pag-aangkat ng bigas ay gagamitin nilang batayan upang pag-aralan ang galaw sa presyuhan ng bigas sa farmgate at retail market habang napoprotektahan naman nito ang mga magsasaka.