Manila, Philippines – Inilabas na ng Presidential Communications Office (PCO) ngayong Lunes ang mga mugshot ng anim na opisyal ng Department of Public Works and Highways (DPWH)–MIMAROPA na inaresto kaugnay sa umano’y maanomalyang flood control projects sa rehiyon.
Ayon sa PCO, ang paglalabas ng mga mugshot ay bahagi ng pagpapatibay sa kampanya laban sa korapsyon, kasunod ng direktiba ni Pangulong Ferdinand R. Marcos Jr. na tiyaking hindi magiging “masaya” ang Pasko ng mga tiwaling opisyal na sangkot sa katiwalian, lalo na sa mga proyekto para sa flood control.
Inaasahang maglalabas pa ng karagdagang impormasyon ang mga awtoridad habang nagpapatuloy ang imbestigasyon sa naturang kaso.
PANGULO TINIYAK ANG TULOY-TULOY NA IMBESTIGASYON LABAN SA KORAPSYON
Samantala, tiniyak ni Marcos sa taumbayan na nagpapatuloy ang pinaigting na aksyon at imbestigasyon ng pamahalaan laban sa mga opisyal na inuugnay sa katiwalian.
Ayon sa Pangulo, hindi titigil ang administrasyon hangga’t hindi nasasagot ng lahat ng akusado ang mga alegasyon na ibinabato laban sa kanila.
Giit niya, malinaw itong patunay ng determinasyon ng pamahalaan na itaguyod ang hustisya at panagutin ang sinumang mapatutunayang sangkot sa korapsyon.
Dagdag pa ng Pangulo, mananatiling prioridad ng administrasyon ang paglilinis sa hanay ng gobyerno upang maibalik ang tiwala ng publiko.