Manila, Philippines – Hinikayat ni Pangulong Ferdinand Marcos Jr. ang iba pang indibidwal na inisyuhan ng warrant of arrest dahil sa kasong pangungurap—na sumuko na mga otoridad.
Ngayong araw ng Lunes, ibinahagi ni Pangulong Marcos ang bilang ng mga sumuko matapos maisyuhan ng warrant of arrest.
Ayon sa presidente, pito na sa mga may warrant of arrest ang nasa ilalim na ng kustodiya ng mga otoridad.
Isa sa kanila ay sumuko sa National Bureau of Investigation at ang anim ay boluntaryong sumuko sa CIDG.
May dalawa pang akusado na handang sumuko sa otoridad.
Subalit ang natitira pang pito, kabilang si Zaldy Co ay nagtatago pa rin.
Mensahe ni Marcos sa mga indibidwal na hinahanap pa ng otoridad na magkusa nang sumuko para sa maayos at payapang imbestigasyon.
BLUE NOTICE MULA SA INTERPOL VS ZALDY CO, INILABAS NA—DILG
Samantala, nagbanta si Interior Secretary Jonvic Remulla kay Co na hahanapin siya ng gobyerno ng Pilipinas.
Sa katunayan aniya, isang blue notice mula sa International Police Organization (Interpol) ang inilabas laban kay Elizaldy Co.
Sapagkat hanggang ngayon ay wala pa ring ideya ang DILG sa kinaroroonan ni Co.
Tinitingnan na rin ng DILG ang haka hakang mayroong ibang passport at ibang identidad na ginagamit si Co.
Ibinahagi rin ni Remulla na ang ilan sa mga kasabwat umano ni Co ay nakalabas na rin ng bansa.
Partikular na sina Aderma Angelie D. Alcazar na pinaghihinalaang nasa New Zealand, Cesar C. Buenaventura na pinaniniwalaan na sa New York, Montrexis Tamayo na umano’y nasa Jordan.
CO, MULING NAGLABAS NG VIDEO CONFESSION; IGINIIT NA HINDI SIYA TUMANGGAP NG KICKBACK
Samantala, naglabas ng panibagong videoo confession si Zaldy Co, kasunod ng press conference ng DILG.
Pinabulaan ni Co na tumanggap siya ng kickback mula sa mga pondo ng flood control projects.
Giit niya na dumadaan lamang sa kanya ang pera para maibigay kay Former speaker Martin Romualdez.
Wala aniya siyang natanggap na 21 billion pesos, ngunit ang katotohanan umano ay 56 billion pesos ang dumaan sa kanya para ibigay kay Romualdez na paghahatian umano ni Pangulong Marcos at ng House Speaker.
Hiwalay pa umano ang 96 billion na insertion sa national expenditure program para sa 2026.
Paliwanag ni Co na nilapitan siya ni Romualdez noong 2022 at inutusan siya na kailangan nyang makapagbigay ng 2 billion pesos kada buwan.
Sa kabilang banda, binigyang diin ni Chairman Emeritus Dr. Jose Antonio Goitia na ang walang basehang paninira ay hindi lang nakakasira ng pangala, kundi nakakasira ng bansa: “Lason ang tsismis, hindi ito naglilingkod sa bayan. Naglilingkod lang ito sa mga gustong maghasik ng kaguluhan.”
Patuloy ang kanyang paalala sa publiko na hanapin ang ebidensya laban sa mga paratang ni Zaldy Co sa administrasyong Marcos.
Patunay aniya ang paglago at reporma sa ekonomiya sa Pilipinas na hindi nagpapatinag ang pangulo sa mga paratang laban sa kanya.—Krizza Lopez, Eurotv News