Manila, Philippines – Nakipag-ugnayan na sa embahada ang tatlo pang akusado na sangkot sa flood control anomaly at nagpahayag na uuwi sila sa Pilipinas.
Ayon kay National Bureau of Investigation (NBI) Lito Magno, nanggaling ang kanilang impormasyon mula sa Department of Interior and Local Government (DILG).
Kahapon, ibinahagi ni Interior Secretary Jonvic Remulla na may ilang sangkot sa anomalya ang nakalabas na ng Pilipinas.
Isa na roon si Aderma Angelie Alcazar na pinaghihinalaang nasa New Zealand, Cesar X. Buenaventura na pinaniniwalaang nasa New York at si Montrexis Tamayo umano’y nasa Jordan.
Samantala patuloy ang pagbabantay ng NBI sa galaw ni Co mula sa huling impormasyon ng DILG na ito’y nasa Japan.
Nitong Martes muling nag-upload ng video confession si Co sa kanyang social media.
Sa naturang video, inaakusahan niya si Pangulong Ferdinand Marcos Jr. ng pag-iinsert ng 100 billion pesos sa National Expenditure Program sa 2026.
Sinabihan pa umano siya ni Pangulong Marcos na huwag siyang mangialam sa mga insertion ng pangulo.
Nadawit din ang pangalan ng anak ni Pangulong Marcos na si House Majority Floor Leader Sandro Marcos na mayroon din insertion.
Subalit, mariin itong pinasinungalingan ni Sandro.
Pinaalalahan niya ang publiko na walang kredibilidad si Co na may interest na guluhin ang gobyerno sa pamamagitan ng pagkakalat ng kasinungalingan at siyang maysala issue ng korapsyon.
Aniya ni Marcos, target ni Co na pabagsakin ang administrasyon nang sa gayon ay maabswelto siya sa mga kasong isinampa laban sa kanya.
Iginiit din ni Sandro ang pagkakatanggal sa pwesto ni Co bilang Chairman ng House Appropriation, dahil sa pagkakadiskubre ng mga mambabatas ng kanyang walang habas na pangungurakot sa pondo sa flood control projects.—Krizza Lopez, Eurotv News