“I do not negotiate with criminals.”
Ito ang tila naging sagot ni Pangulong Ferdinand Marcos Jr. para kay dating Ako Bicol Partylist Representative Zaldy Co na nagtangka umanong makipagnegosasyon sa kanya.
Sa isang video statement, isiniwalat ni Marcos na sinubukang makipagnegosasyon sa kanya ng kampo ni Co sa pamamagitan ng abogado nito.
Ang nilalaman ng negosasyon, blackmail umano laban sa gobyerno.
Matatandaan na sa mga nakalipas na linggo, lumutang na si Co, sa pamamagitan ng confession videos matapos ang ilang buwang pananahimik mula nang madawit sa flood control scandal.
Sa mga nasabing video, idiniin nya ang pangalan ni Marcos, dating House Speaker Martin Romualdez, at ilang miyembro ng Gabinete na umano’y utak sa likod ng ginawa nyang insertions sa 2025 budget.
Ang kondisyong ito ni Co, diretsahang hindi tinaggap ng Pangulo.
Sa parehong video statement, iniulat na rin ni Marcos ang mga developments sa mga kasong kaugnay ng flood control scandal.
Ayon kay Marcos, dalawang freeze order na ang nakuha ng Anti-Money Laundering Council (AMLC) para sa mga ari-arian ni Co.
Samantala, nakatakda na rin aniyang magsumite ang Independent Commission for Infrastructure (ICI) at ang Department of Public Works and Highways ng mga ebidensya sa Ombudsman para sa patong-patong na kaso laban sa walong kongresistang may-ari ng construction companies na sangkot sa anomalya.
Kabilang sa mga kasong irerekomensa ay plunder, anti-graft, at conflict of interest.
Sa kasalukuyan, mayroon nang 17 arrest warrants ang naisyu laban sa mga sangkot sa flood control scandal, kabilang na ang kay Zaldy Co.
Walo sa mga ito, kasalukuyan nang nasa kustodiya ng mga awtoridad.—Mia Layaguin, Eurotv News