Manila, Philippines – Patuloy na lumalakas ang Bagyong Verbena habang kumikilos ito patungong kanluran, ayon sa pinakahuling update ngayong Lunes, Nobyembre 24. Sa ulat ng 8:00 AM bulletin, nananatiling malakas ang bagyo at kumikilos sa bilis na 20 km/h habang tumatahak sa Philippine Sea.
Batay sa 7:00 AM update, ang sentro nito ay tinatayang nasa 290 km silangan ng Surigao City, Surigao del Norte.
Nagtataglay ito ng maximum sustained winds na 45 km/h at pagbugsong umaabot sa 55 km/h, habang umaabot naman sa 200 km ang lawak ng malalakas na hangin mula sa sentro.
Itinaas naman sa Tropical Cyclone wind signal no.1 ang ibat-ibang lugar sa Luzon ,Visayas at Mindanao.
SUSPENDIDO ANG BIYAHENG PANDAGAT SA MASBATE DAHIL SA BAGYONG VERBENA
Naglabas ng Sea Travel Advisory ang Coast Guard Station Masbate ngayong Nobyembre 24, 2025, matapos ilabas ng PAGASA ang pinakabagong Tropical Cyclone Bulletin para sa Tropical Depression Verbena.
Dahil nakataas ang Tropical Cyclone Wind Signal No. 1 sa mainland Masbate, pansamantalang ipinagbawal ang lahat ng biyahe ng sasakyang pandagat, anuman ang uri at laki, maliban sa mga sasakyang kinakailangang pumasok sa ligtas na himpilan.
Pinayuhan ng Coast Guard ang mga marino at may-ari ng bangka na maging mapagmatyag at magpatupad ng kinakailangang pag-iingat habang patuloy na mino-monitor ang lagay ng panahon at karagatan.
Ayon sa ahensya, babalik lamang ang operasyon kapag tuluyang bumuti ang kondisyon ng panahon at dagat at matapos ang pormal na pag-anunsyo.