Manila, Philippines— Nagdeklara ang Malacañang ng mga special non-working day sa ilang probinsya, lungsod, at munisipalidad sa bansa ngayong Hunyo bilang paggunita sa mga anibersaryo, kapistahan, at mahahalagang makasaysayang okasyon sa kani-kanilang lugar.
Ayon sa mga proklamasyong inilabas ng Office of the President sa pamamagitan ng Executive Secretary, ang mga idineklarang holiday mula Hunyo 15 hanggang Hunyo 25 ay nagbibigay ng pagkakataon sa mga residente na makilahok sa mga pagdiriwang at iba pang aktibidad ng kanilang komunidad.
Sa ilalim ng umiiral na batas paggawa, ang mga empleyadong papasok sa trabaho sa araw ng special non-working day ay maaaring makatanggap ng karagdagang kompensasyon alinsunod sa itinakdang patakaran sa pasahod. Samantala, ang mga hindi papasok sa trabaho sa naturang araw ay walang kaukulang parusa. Naglabas na rin ang Department of Labor and Employment (DOLE) ng mga gabay upang matiyak ang tamang pagpapatupad ng mga patakaran sa sahod.
Ngayong Hunyo 15, ginugunita sa Angeles City ang anibersaryo ng pagsabog ng Mt. Pinatubo sa ilalim ng Proclamation No. 1293. Kasabay nito, ipinagdiriwang naman ng bayan ng Buguey sa Cagayan ang kanilang ika-430 anibersaryo ng pagkakatatag sa bisa ng Proclamation No. 1294.
Sa Hunyo 16, ipinagdiriwang ang mga founding anniversary ng mga bayan ng Dumalinao sa Zamboanga del Sur, Pamplona sa Negros Oriental, at Pili sa Camarines Sur. Susundan ito ng pagdiriwang ng Charter Anniversary ng Bindoy, Negros Oriental sa Hunyo 17.
Sa Hunyo 18 naman, ipinagdiriwang ng Barlig sa Mountain Province ang ika-60 anibersaryo ng pagkakatatag nito. Habang sa Hunyo 20, selebrasyon ng ika-79 Cityhood Anniversary ng Lipa City sa Batangas at Founding Day ng Guinayangan sa Quezon.
Magkakaroon din ng pagdiriwang sa Socorro, Oriental Mindoro sa Hunyo 22. Samantala, minamarkahan ng Batac City sa Ilocos Norte ang ika-19 Charter Anniversary nito sa Hunyo 23.
Sa Hunyo 24, ipinagdiriwang sa Masbate ang Kapistahan ng Bagat-Dagatan sa ilalim ng Proclamation No. 1308, kasabay ng Founding Anniversary ng bayan ng Caba sa La Union.
Sa Hunyo 25 naman, ginugunita ang Founding Anniversary ng mga bayan ng Calanasan sa Apayao at Sabangan sa Mountain Province.
Patuloy na hinihikayat ng pamahalaan ang publiko na makilahok sa mga pagdiriwang bilang pagkilala sa kasaysayan, kultura, at pagkakakilanlan ng kani-kanilang lokalidad.